Am Friti Obe heimer üs am füfi im Loch zum Schminke troffe. Zwöi Stung spöter simer när Richtig St. Erhard für ad Tereter Nächt abgfahre. Dr Car isch nid wie süsch ganz vou gsi, wüu mer nume öppe zwänzgi si gsi. Dr Chauffeur het vo däm aber nid viu gmerkt… es isch luschtig und luut zue und här gange i däm Car.

Womer ds St. Erhard si acho, heimer d Instrumänt afe einisch ufenes Högerli zum Schueuhuus ueche müesse träge und stoosse. När hets öpis Znacht gä. Me het sech für Hamburger, Chicken Nuggets oder Pommes Frites chönne entscheide…wär het äch dert uf d Spiischarte gschribe, dass me ou Fondue Chinoise oder Penis im Teig cha ha? Komisch, komisch. Vo üs isch das natüüüürlech niemer gsi 😉

Am nüni isches du scho bereits Zit für üse Uftritt im Feschtzäut gsi. Es het zwar rächt viu Lüt gha, aber die si no schwirig gsi vom Hocker z houe…do seitme doch, die Luzärner chönni so fasnachte. Mir hei näbst üsne autbekannte Lieder s erste Mou es nöis vo dere Saison gspiut, nämlech ds „Cheating“ von John Newman. Das het doch mou gar nid so schlächt tönt!

Nach üsem Uftritt hei sech de scho die erste Dorfbachschränzer verabschidet. Die angere si entwäder ir Bar no eis, zwöi, drü…go näh oder si de angere Guggene go zuelose. Zwüsche de Guggeuftritte het de d Erica Arnold – The One Woman Power Frau Band – für ungerhautig gsorgt. Si hets ächt druffe gha und hets gschafft, dass am Schluss du glich no aui im Zäut uf de Bänk gstange si und mitgsunge hei. Ou unger de Schränzer isch e super Stimmig gsi – aui hei drunke, glachet, gsunge und tanzet.

Am eis isches du när wider gäge hei zue gange. Das heisst aber nid, dass scho aui hei wöue go pfuuse…es paari hei när z Madis no dr Saloon unsicher gmacht u hei dert no chli gfeschtet…bi töune hetme d Spure dervo am nöchste Tag emu immer no gseh 🙂