Am 1. Februar, Samschti morge gli isches los gange…

Am haubi Eufi isch Träffpunkt gsi zum Schminke und perfekt für i Eufi-Schuss. Am haubi Eis simer de im Car ghöcklet für i Wase!

Aus erschts hets dert afe es feins Apèro gä! Mmmhh.. do nämer afe nochli… Nach dere sterchig hets de chönne losgo mitem Umzug, dä het genau di richtigi lengi gha! Strössli ufe, Strössli abe bis id Beiz uuuuund…..FERTIG! Aschliessend heisech aui Guggene zäme do und es het es grosses Monschterkonzärt gä, d Lüt hei fröid gha, genau so wid Spiler!

Scho gli druf isches Zyt gsi fürs Znacht. Dert heimer du plötzli bau chli müesse bressiere wiumer scho a nöchscht Uftritt hei müesse. A de Lüt a si äuä di meischte no bim Znacht blibe höckle…

Mir hei de es chlises Pöiseli gmacht, öpis trunke u när no im Grüttli gschpiut. Dert isches richtig schön gsi!

Üse Tambi het no für ne spötere Uftritt im Zäut gluegt, wos de när ou meh Lüt het gha!

I säge nume WAU….

Vo den a simer när no gmüetlech e chli zäme gsi, hei gsunge, glachet u öppe no eis trunke und si de am Schluss mitem Car ou wider guet z Madis acho!

Es isch e super Samschti gsi u mir gö aui gärn wider!

Mir fröie üs jetz aui riisig uf üsi Fasnacht wo gäng e chli wi nöcher chunnt…

Vom 7.-12. März fingit u ghörit dir üs irgendwo i de Gässli oder Beizli vo Langetau, mir fröie üs natürli sehr Öich dert a z‘träffe!