Am Nomi am haubi vieri trifft me sech im Loch zum Schminke. Äs het ä nöie im Schminkteam u dä het am Afang no nid so s Gspüri für d Farbmängi. Pünktlech uf haubi sächsi si aber aui gschminkt und mir si zum istige bereit. Si fahre jetz glich mit zwene Busse, somit chöi mer aui glichzitig los.
Z Brittnou acho wär du luune ou scho gar nid eso schlächt, nume das huere Wätter wot noni so rächt wie mir’s gärn hätte. Muess das so schiffe?! Naja, mache mer s Beschte drus. Äs paar kenne ömu ou gar nüt und tanze im Räge zu de Uftritte vo de angere Guggene. Angeri bevorzuge am schärme afe äs Dünns z’näh und äs paar hei chum simer acho ou scho äs Schnitzubrot ir Hang.
Nachem erschte Uftritt dusse im Schiff hei mer’s de langsam gseh mit däm Wätter und verzieh üs is Zäut, wos öppis z’ässe und z’trinke git. Hei mer scho erwähnt, dass Pommfrit mit Sänf gar nid sooo fein si? Frogt sech nume würum dass de äs haubs Kilo vom däm Züg zmitz ufe täuer pfatcht isch… A mou, mir wüsse würum: uf härkömmlechi Art isch nüt me use cho, när het si der Techu abgschrisse und miteme grosse Löffu ä richtig schöni Portion ufglade…
Nachdäm mer verpflegt si u no chli Gugge glost hei und umetanzet si, isch ou scho gli üse Uftritt noche. Plötzlech steit der Hiupi do, super Überraschig! Är und der Schär hei eigentlech gseit si chömi nid u de wäre mer posunemässig fei ächli mager ufgsteut gsi. Äs paar Minute spöter steit der Schär ou do… Somit wäre mer de so zimmlech komplett und äs cha los go…
Äs geit fei ächli ab i däm Zäutli, wo mer mit üsne Topphits uffahre. Aber mueess daas so verfluecht heiss si uf dere Bühni?! Isch jo abaartig! Aber d Lüt hei fröid, und mir hei ou fei äschli Spass a däm Uftritt.
U de isch de ou scho langsam spät und die erschte mache sech scho mou ufe Heiwäg. Die angere si no äs bitzeli i Partyluune… D Shotbar hei si das Johr ächli versteckt dünkt’s eim fasch, aber sicher isch die vor üs natürlech glich nid. Isch aber nid aus sooo fein was es dert git, aber me het jo aus Ching glehrt, me müess vo auem chli probiere 😉
Mir lö der Obe lo usklinge und nä am zwöi wider der Bus ungers Füdle für Richtig hei zue… Dä fahrt ou brav über Langethu, das chunnt äs paarne grad gläge… Apropos gläge, teu si am Morge när gloub ou chli lenger gläge… 😉
