Guggenmusig Madiswil

Übungsweekend 2014

S’aujährleche Üebigsweekend isch ou das Mou wider sensationell gsi.

Mit vier nöie Stück heimer zimlech Büez vor üs gha. Drum hei mer de am Samschti nachem Iispile grad sofort ou mit dene gstartet.

Nach zwene Regischterprobe am Morge, emne feine z’Mittag vo üsem Keiteringtiim und no es paarne Gsamtprobe am Nomi het de das ou gar nid mou soo schlächt klappet.

Mir si ömu mitemne positive Gfüeu und bi beschter Luune is Obeprogramm gstartet.

Das het agfange mitemne sensationelle Fondü Schinuas und isch witergange mit der Toufi vo üsne Nöimitglider wo mer ar letschte HV hei ufgno.

Die hei müesse bekannti Wärbespots nochespile, u hei das mit Bravour gmeischteret. U wiu mir üs so uuunheimlech ab däm hei chönne amüsiere, hei si ihre Zinnbächer vo ihrne Gottene u Göttine mit tosendem Aplous überreicht übercho.

Witergange ischs Programm när mit Montagsmaler, Wandtafele-Schutte und emne Buechstabe-Spili. Nachem offizielle Teil het me de chönne wähle, zwüsche Schwarzpeter, LoopingLouie und Halli Galli. Währendem ganze Obe isch d’Stimmig würklech super gsi. Es isch huere viu gsunge, glachet u gschnoret worde.

So um di 4e si de aui im Huli gsi. 4 Stung spöter het üse Presi aber scho s’Gfüeu gha, är müessi üs mit „wunderschöne“ Örgelikläng cho wecke. Töune hets gfaue, u töune haut nid so… Weis nid, ob s‘Mudere vilech nid nume ar Musig isch gläge 😀

Item… Am 9i ischs mit Probe witergange. Dert hetme natürlech no einisch Vougas gä.

Nachem Mittag si mer de füre Räscht vom Nomi no chli use go spile. Bi däm Wätterli natürlech perfekt. Es het super tönt, de Lippe hets besser do und chli früschi Luft duet jo schliesslech aune guet.

Am haubi drü isch de s’Keiteringtiim no cho lose, was mer eigentlech das ganze Wuchenänd eso gmacht hei. Abgseh vo eim Stück si eigentlech aui zimlech schön gspiut worde.

U s’aujährleche Ziu – der Tambi zum Gränne z’bringe – het me am Schluss de gliich ou no erreicht 😛

I däm Sinn möchti mi bi aune wo bir Organisation hei mitghoufe härzlech bedanke.

Es Riise-Merci geit natürlech a üsi Chuchi-Crew; dir sit di Beschte!!
U de Mitglider es „Schööööllöööööllöööööllööööööööööö …“ 😀

Dir sit eifach wäutklass, u es fägt huere mit öich zäme z‘si!!! Merci fürs Mitmache und ufne tolli Fasnacht!

Dorfbachschränzer AHU!