Guggenmusig Madiswil

Übungsweekend 2013

Me chönt säge, dass d’Motivation am Morge, womer losgfahre si, no grad nid ufem Höhepunkt isch gsi. Womer aber üsi tolli Chuchimannschaft hei dörfe begrüesse hets de sofort besseret. Es fröie sech nämlech aube aui grad sofort uf die Köschtlechkeite, wonis di 4i aube uftische. I däm Zämehang grad es grosses Merci ad Mariann, ad Ruth, a Ueli und a Beat; dir sit super!!

Üsi Prob heimer gstartet mitere Tonleitere in C-Dur, 4 Schleg pro Ton. Viu meh hets aber de gar nid bruucht. Di Lüt si scho vorem offizielle Start im Proberuum obe gsi u hei chli is Guuggi inebloose.

Die Lieder hei klunge u tönt, es hät nid besser chönne loufe. Ou i de Regischterprobe isch freiechli gschaffet worde. Hie u do het me sogar es paar Fähler chönne usmerze wo sech mit der Zit hei iigschliche gha.

Im zwöite Töu vo däm Probetag hei mer nis de üsem dritte nöie Stück „Roar“ gwidmet (di erschte zwöi hei mer scho i de reguläre Probe zimlech iigstudiert). Für das hei sech d’Regischter wider i separati Rüüm verzoge, d’Note gstudiert u mou druflosgspiut.

Im spötere Nomittag heimeris de wider versammlet u das Stück probiert zämezstifle, was de ou gaaar nid mou so schlächt klappet het.

Aus i Auem auso e tolle u erfougriiche-Probetag.

Ou am Obe isches luschtig zue und här gange. Me het ir Sändig „Wetten dass“, mitem Thomas Gottschalk und der Michelle Hunziker, prominänti Gescht begrüesst und mit dene e chli plöiderlet. Ou d’Wettkandidate hei sech zimlech gschmiichlet gfüeut, näb sore höche Prominänz wi bisipiuswiis er Cindy aus Marzahn, em Roberto Blanco oder em Mike Shiva z’höckle u sech mit dene z’ungerhaute.

Wo de die Sändig – natürlech mit Zitüberschrittig – isch düre gsi, isch s’Obeprogramm noni fertig gsi. Zumne Bier oder zwöi het me witeri Spili gmacht, viu gschnoret u de no chli Youtube-Fiumli gluegt. Das macht me jo gloub ir hütige Zit….

Am Morge am 4i si de ou di letschte Partymüs is Huli. Schliesslech isch am Morge am 8i scho wider Tagwach gsi.

Töu hei meh u töu weniger gmüetlech z’Morge gno u öpe es Käfeli oder es Göggeli gschlüürfet. Am 9i ischs de witergange mit Probe. Die erschte Kläng si no zimlech liisli u zrugghautend gsi. Me weis nid a was genau dass das gläge isch. Ob ar füreche Morgestung, oder ar späte Schlofenszit

Aber nachere haub Stung ischs de plötzlech losgange. Potz tuusig hei die bloose u gschlage. Eso hets Fröid gmacht u d’Motivation isch wider gstige. Schlussändlech hei mer üsere Chuchimannschaft die nöie Stück tiptop chönne vorstpile. Si hei Fröid gha, d’Tambööse het grännet (natürlech us luter Fröid a ihrne Schööfli) u d’Mitglider si us däm Grund ou sehr zfride i Fürobe gschobe.

Eso isch das tolle Üebigsweekend einisch meh iiwandfrei über d’Büni.

Merci aune für s’Mitmache.
Es fägt unheimlech mit öich u i fröie mi wine Moore uf die kommendi Fasnacht. Das wird ein Spaaaaaass.
Öii Tamböse