Guggenmusig Madiswil

Fasnacht Willisau 2014

Grad ächli zitig steit dä cheibe Car uf Platz u de müesse die einte no fasch ächli pressiere mit Schminke und Frisurrichte. Im Car git’s äs chüus Bierli u de geit’s ratzfatz und mir stöh z Willisou. Am sibni isch der Umzug, jetz isch no nid emou füfi, si auso rächtzitig do. Hmm… was mache? Instrumänt uslade u richtig Autstadt go ä Beiz sueche. Äs het gar nid so mängi u de cha me sech jo vorsteue, dass der Konkuränzkampf nid so gross isch und d‘Servierdüüse somit ou nid bsungers erfreut muess si ab üsem Bsuech. Ömu wo de der eint oder anger no äs chlises Hüngerli verspürt und äs Sandwitchli bsteut, lüpfts dere fasch der Huet! Jetz muess die armi doch würklech no schaffe. Hautit nech s nöchscht mou chli zrugg, vilech söt öper im Vorus alüte, wie mängs Sandwitch dass mer de näme! 😉 Womer wider dusse si und mir s Thema Zigarette-Choufe no spontan i Sinn chunnt, isch si ömu de so nätt gsi und isch äxtra cho der Outomat ischaute (obwou für mi wider unverständlech isch würum dass dä nid scho louft).

Mir stöh auso no chli ume und do loufe ou scho äs paar angeri Güggeler ume, teu ou scho fei ächli parat… De mache mer üs doch ou mou uf d‘Socke zum Usgangspunkt vom Umzug, wo’s zu üsere Fröid sogar no ä Münzezwätschgestang het. Do nämer doch no eis…

När geit’s los, mir spile üs mit Abba-Medley, Udo Jürgens & Co. dür d‘Willisouer Autstadt bis zur Chile. Dert git’s afe wider äs Bierli, schliesslech müesse mer jo no chli uf üse Uftritt warte. Mir si aus letschti dran und gä äs paar Stück zum Beschte. Und no eis. Und no eis. Die wei chum me höre!

De hei mer de no äs Lützli z’guet und beobachte derbi zuefäuig, dass d‘Feschtmusig vomne iPhone chunnt wo äs Mikrofon dra häre gleit isch, auso Hi-Tech hei si hie. Fingi sympathisch. När mache mer nis uf d‘Socke richtig Haue und ungerwägs git’s äs hammermässigs Zwüscheständli vom Rhythmus. Huere geil!

När heisst’s Instrumänt i Göppu und ab zur Party! Ufem Platz usse spile no Guggene, äs git öppis z’Ässe und natürlech z’Trinke und dinne geit der Wouf los. Äs het zum Leid vom einte oder angere natürlech ou ä Shot-Bar 😉

D‘Erinnerige wärde langsam verschwumme… Äs wird tanzet, glachet, seiligumpet i verschidene Variatione (oder zmingscht probiert) und Corä’s Megadance übertrifft aues. So lö mer dä luschtig Obe lo usklinge und der Car fahrt üs i zwe Fahrte uf Madis zrugg. Är muess de ou no äs churzes Zwüschestöppli mache. Äs möge nid aui s „Carfahre“ so guet verliide… 😉